Räsmi xäbärlär

Qazanda Röstäm Miñnexanovka Zamança idärä itü praktikaları üzägeneñ eşläw printsipların täqdim ittelär

Ğädel Wafin Zamança idärä itü täcribäläre üzägeneñ eşçänlegenä qarata qızıqsınu ni säbäple barlıqqa kilgäne xaqında söyläde.

 (Qazan, 7 iyün, «Tatar-inform»). Bügen Tatarstan Prezidentı Röstäm Miñnexanov «Zamança idärä itü praktikaları» kompaniäse belgeçläre belän oçraştı. Älege oçraşu Röstäm Miñnexanovnıñ TR Xökümät yortındağı eş bülmäsendä uzdı, dip xäbär itä TR Prezidentı matbuğat xezmäte.
Çarada TR Prezidentı yärdämçese Läylä Fazlıyıva, TR sälämätlek saqlaw ministrı Ğädel Wafin, Zamança idärä itü praktikaları üzägeneñ ölkän ekspertı Yüliä Urojayeva, «MaqKinzi i Qo» kompaniäse wäkilläre h.b. qatnaştı.
Oçraşuda qatnaşuçılarnı täqdim itep, TR sälämätlek saqlaw ministrı Ğädel Wafin Zamança idärä itü praktikaları üzägeneñ eşçänlegenä qarata qızıqsınu ni räweşle barlıqqa kilgänen söyläde. Anıñ äytüençä, ber klinikağa barıp qarağaç, klinika eçendäge protsesslar belän idärä itü täcribäsen, logistikasın häm meditsina uçrejdeniesen patsientlarğa añlayışlıraq itü yünäleşlären öyränergä digän qarar qabul itelgän.
Üzäkneñ ölkän ekspertı Yüliä Urojayeva kompaniäneñ eşläw printsipları xaqında tulıraq söyläde. Anıñ süzlärenä qarağanda, Tatarstanda sälämätlek saqlaw ölkäsendä citdi adım yasalğan. Şulay da, grajdannarnıñ ğömer ozınlığın arttıru, ülüçelär sanın kimetü, ğomumän, tormış şartların yaxşırtuğa yünälderelgän ambitsioz burıçlar quyılu säbäple, alğa taba üsärgä kiräk. «Meditsinanıñ berençel zvenosın sistemalı üzgärtmi torıp, bolarnı tormışqa aşıru awır», – dip bilgeläp uzdı Yüliä Urojayeva.
«Sälämätlek saqlaw ölkäsendäge berençe masştablı reforma uzğanda, statsionar yärdämgä basım yasalğan ide, – dide ul. – Berençel zveno isä keşegä, statsionarğa möräcäğät itmiçä genä, sälämät qalırğa häm yäşärgä mömkinlek birä. Başqa regionnarnıñ klinikalarında bez näq menä berençel zveno belän eşläwgä yöz totabız».
Yüliä Urojayeva, real' patsientlar misalında, waqıtında tikşerenü häm ambulator (terapiä, tikşerü) däwalanu uzğan awıruğa häm inde awır xäldä statsionarğa kilep eläkkän patsientqa küpme çığım taläp itelgänen kürsätte.
«Meditsina uçrejdenieläreneñ bulğan täcribäsen qullanırğa kiräk, zamança sälämätlek saqlaw sistemalarınıñ barısı da bügen şul yuldan atlıy», – digän fiker belderde Urojayeva.
Monnan tış, Röstäm Miñnexanovka Qazan poliklinikaların öyränü nindi näticälärgä kitergänen söylädelär, şulay uq bu yünäleştä eş alıp baruda yaña sistema buldıru turındağı qaraşlar belän urtaqlaştılar.

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши