Iqtisad

Tatarstannıñ Säwdä-sänäğät palatasında Paqstan eşmäkärläre belän oçraşu uzğan

Qunaqlar beldergänçä, Paqstannı respublika belän maşina tözü häm neft ximiäse ölkälärendä xezmättäşlek qızıqsındıra

 (Qazan, 7 iyün, “Tatar-inform”). Tatarstannıñ Säwdä-sänäğät palatasında Tatarstan biznesı wäkilläre häm Paqstan İslam Respublikası eşmäkärläre delegatsiäse oçraşuı uzğan. Paqstan delegatsiäse Qazanğa Paqstannıñ däwlät ministrı, Säwdä ministrlığı qarşındağı Säwdä üseşe buyınça idäräneñ başqaruçı direktorı şäyex Möxämmäd Mönir citäkçelegendä kilgän.

Tatarstannıñ Säwdä-sänäğät palatası mömkinlekläre häm xezmätläre turında qunaqlarğa idärä räise urınbasarı Valeriy Gerasimov söylägän. Ul ike yaqnıñ da iqtisadi häm investitsion potentsialı belän tanıştıru mömkinlegen birgän mondıy oçraşunıñ üzara xezmättäşlekkä yaña ofıqlar açu mömkinlegen birüen bilgeläp uzğan.

Şäyex Möxämmäd Mönir Paqstan häm Rossiä arasında säyäsi ölkädä dustanä mönäsäbätlär cayğa salınğanın, ämma eşlekle xezmättäşlekneñ citärlek külämdä tığız bulmawın assızıqlağan. Anıñ süzlärenä qarağanda, Paqstan respublika belän maşina tözü häm neft ximiäse ölkälärendä xezmättäşlek itü belän qızıqsına. Ul, şulay uq, respublikağa awıl xucalığı produktsiäsen häm ciñel sänäğät eşlänmälären import itep kertüne täqdim itkän. Şäyex Mönir Tatarstanda yuğarı hönäri belemneñ däräcäse yuğarı buluın bilgeläp uzğan häm Paqstannıñ Tatarstanda belem alu öçen yullanaçaq studentlar sanın arttırırğa äzer buluın äytkän.

Çaranıñ axırında eşmäkärlärneñ “bi tu bi” formatında oçraşuları ütte, dip xäbär itälär TR Säwdä-sänäğät palatası matbuğat xezmätendä.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши