Anda ölqäneñ dürt rayonındağı tatar avıllarınnan 30 yaşqäçä bulğan qızlar qöç sınaştı

(Qazan, 20 fevral, “Tatar-inform”, Ğölnaz Şäyxi). Tübän Novğorod ölqäse Spas rayonı Bazlau avılında Bötendönya tatar qonğressı Başqarma qomitetı, Bötenrossiya tatar avılları oeşması häm "Söembiqä” jurnalı berğä "Avıl qızı” bäyğeseneñ saylap alu turın uzdırdı. Anda ölqäneñ dürt rayonındağı tatar avıllarınnan 30 yaşqäçä bulğan qızlar qöç sınaştı. Aralarında studentlar, soçial eşçelär, mädäniyat xezmätqärläre dä bar ide. Qatnaşuçılar biş nominaçiyadä qöç sınaştı. Alar arasında "Xucabiqä”, "İñ sälätle qız”, "Ğüzäl", "Üz eşeneñ ostası”, "Bulğannan bar da bula” qebeq tördä ciñüçelärne bilğelädelär. Qızlarnıñ barısı da uñğannar, bulğannar. Härqaysı üz nominaçiyasendä ciñüçe. Şulay da başqalabız Qazanda uzaçaq final öleşenä jyuri tarafınnan ber ğenä qız saylanıp alındı. Pilna rayonı Safacäy avılınnan Läysän Xösäenova iñ "Ğüzäl” häm "Ciñüçe” titulların yaulap aldı. Çuvaşiyaneñ Qomsomol rayonı Çiçqan avılınnan, xäzerğese qöndä Spas rayon mädäniyat yortında xormeyster bulıp eşläüçe Ğüzäliya Zinnätullina, «İñ sälätle qız» nominaçiyasendä ciñüçe isemen yauladı. Läysän Xösäenova ciñüçe bulıp finalğa Qazanğa barıp "Avıl qızı” bäyğeseneñ yomğaqlau öleşendä çığış yasayaçaq. Ğüzäliya Zinnätullina Urmayğa qilep xalıqara "Urmay moñı” festivalendä qatnaşaçaq. Bäyğedä Bötendönya tatar qonğressı Başqarma qomitetı isemennän, mäğlümät büleğeneñ citäqçese, Tatarstannıñ atqazanğan mädäniyat xezmätqäre Ğölnaz Şäyxi, Bötenrusiya tatar avılları oeşması citäqçese Räşit Säncapov, “Söembiqä” jurnalınıñ baş möxärrir urınbasarı Rämziya Qaşapova, Tübän Novğorod ölqä milli-mädäni avtonomiyase räise, ölqä möselmannarınıñ Diniya näzaräte räise Ğayaz xäzrät Zaqirov, ölqädäğe tatar avılları urnaşqan rayon xaqimiyat başlıqları qatnaşıp bäyğene oeştıruda öleşlären qerttelär. Qunaq bulıp Çuvaşstannan, Qomsomol rayonı tatarları milli-mädäni avtonomiya räise Färit Ğıybatdinov qatnaştı.