Firdäves Äxtämova Ğaliäsğar Qamal teatrında yartı ğasır icat itqän qüreneqle şepqinçılarnıñ berse ide

(Qazan, 22 fevral, “Tatar-inform”). Tatarstannıñ xalıq artistı Firdäves Äxtämovanıñ vafat buluı nisbätennän, respubliqa cämäğatçeleğe qayğı urtaqlaşa. “Tatarstan Respubliqasınıñ teatr sänğate tirän qayğı qiçerä. 22 fevraldä qatı avırudan soñ 73 nçe yaşendä Tatarstannıñ xalıq artistqası, milli säxnäbezneñ yaqtı yoldızlarınnan berse, xalqıbıznıñ yaratqan artistqası Firdäves Qayum qızı Äxtämova vafat buldı. Firdäves Äxtämova Ğaliäsğar Qamal teatrında yartı ğasır icat itqän qüreneqle şepqinçılarnıñ berse ide. F.Q.Äxtämova 1939 elnıñ 21 iyulendä Laeş rayonınıñ Yauşıyq avılında tua. Ul ätiläre suğışta hälaq bulğan buın balası. 11 yaştä änisez dä qalıp, abıysı tärbiyasendä Qazanda üsä. Mäqtäpne tämamlağannan soñ, tatar teatrı öçen maxsus oeştırılğan törqem belän Mäsqäüğä Şepqin isemendäğe yuğarı teatr uçilişesına uqırğa qitä. 1961 elda, anı tämamlap, Ğ.Qamal isemendäğe Tatar däülät Aqademiya teatrı truppasına qabul itelä. Qabatlanmas talantqa, üzenä ğenä xas ahäñğä, säxnä ğüzälleğenä iya bulğan artistqa icatınıñ berençe adımnarınnan uq qüpsanlı tamaşaçılar mäxäbbäten yaulıy. Anıñ icat repertuarında tatar, rus, çit il avtorları äsärlärendä başqarılğan 100ğä yaqın obraz bar. Törle ellarda başqarılğan Färxinur — «Ğölcamal» (N.İsänbät); Mäysärä — «Ameriqan», Fatıyma — «Sünğän yoldızlar», Zöhrä — «Nazlı qiyaü», Şämsi äbi — «Qazan sölğese» (Q.Tinçurin); Rozaliya — «Soñğı xat» (X.Vaxit); Lipoçqa — «Ağay-ene aq mıeq» (A.Ostrovsqiy); Sofya — «Ber tön» (B.Ğorbatov); Elmira — «Duslar cıelğan cirdä», «Xuşığız!», Altınçäç — «Änilär häm bäbilär», Firaya – «Ğaliyabanu, sıluım irqäm» (T.Miñnullin); Xatın — «Biçura» (M.Ğıyläcev); Fatıyma — «Öçäü yulğa çıqtıq» (R.Batulla); Cämilä — «Bäxetsez eğet», Bibi — «Berençe teatr», Bädiğılcamal – «Qaeniş, qöndäş häm başqalar» (Ğ.Qamal); Abruy — «Mäxäbbät turında söyläşiq» (İ.Zäyniev) häm başqa rolläre artistqanıñ törle janrda da isqitqeç tormışçan, tabiğıy hämm xisle uenınıñ ürnäğe ide. Firdäves Äxtämovanıñ icatı çın milli xalıqçan rux belän suğarılğan. Ğ.Qamal äsäre buença quelğan “Berençe teatr” televizion filmındağı Bibi obrazı F.Q.Äxtämova icatında häm ğomumän tatar teatrı sänğatendä zur urın alıp tora. 2010 elda VI xalıqara «Altın mönbär» möselman qino festivalendä Firdäves Äxtämova, «Bibinur» filmında töp rolne başqarıp, “İñ yaxşı xatın-qız role” nominaçiyasendä ciñü yauladı. Firdäves Äxtämova xezmättäşlärenä ışanıçlı, qiñ qüñelle dus, yaş buın öçen qayğırtuçan, yardämçel ostaz ide. Xalqıbıznıñ söeqle artistqası, Tatarstannıñ xalıq artistqası Firdäves Äxtämovanıñ yaqtı istäleğe bezneñ qüñellärdä mäñğe saqlanır”, - dielä qayğınamädä.